نص ساعة بدرى

الكسل صحيح احلى من العسل
لكن نص ساعة بس بدرى ربما تفرق كتير
اصحى نص ساعة بدرى و بحلق فى السقف و احمد ربنا انك صحيت ولقيت نفسك جوة بيت لا وكمان على سرير وربما يكون كمان سرير طرى...غيرنا كتير نايمين فى العراء او فى عشش على قالبين طوب

اصحى نص ساعة بدرى و اطلع عالبلكونة وشم شوية هوا -حتى لومش نضيف - واستمتع بشكل الشارع و هو فاضى

اصحى نص ساعة بدرى واعرف قيمة و حلاوة كوباية شاى الصبحية ......ياااااااه عالجمال

اصحى نص ساعة بدرى و لف على اخواتك و والديك وهما نايمين....بص فى وشوشهم...بوسهم....غطيهم...

و احمد ربنا كمان مرة انهم موجودين حواليك غيرك بيتمنى الدقيقة اللى انت واقفها معاهم

اصحى نص ساعة بدرى و انزل الشارع اتمشى 10 دقايق...اتفرج على عربية الفول و هى لسه بتستفتح و اهلنا الجمال ملمومين حواليها كأنه مطعم كباب

اتمشى 10 دقايق واتفرج على الام اللى ماشية وايدها فى ايد ابنها بتراجعله قبل الامتحان

اتمشى 10 دقايق و بص على بياعين العيش ..... و على المحل اللى بيرش مية...ومشغل اذاعة القرأن الكريم وبيسمع الشيخ محمد رفعت

اتمشى كمان شوية و شوف شاب فى ايده اليمين دبلة وبيتشعبط فى المينى باص واعرف لمايسرح انه بيقول "كله عشان خاطرها" و ادعيله اوى وادعيلها

نص ساعة بس بدرى هتخلى يومك احلى كتيييييييير
نفسى فى نص ساعة -بس- بدرى

سنووايت و السبع بنات - Episode 2

كنا قد وصلنا فى الحلقة السابقة الى نجاح سنووايت فى دخول احدى الدول الشكيكة هرباً من زوجة ابيها الساحرة الشريرة و انها قد غيرت اسمها امعاناً فى التمويه من "سنووايت" الى "سنية السيد" كى لا يثير اسمها الاجنبى شكوك اهالى البلد

و نصحها اولاد ....الحلال باللجوء الى افضل مكان للختباء و هو حى الموسكى الذى يعج-حلوة يعج دى - بالرائحين و الغادين من كل فج عميق وبالتأكيد لن تستطيع زوجة ابيها الامساك بها فى مثل هذه المنطقة
و لجأت الى مسجد السبع بنات فى الميدان الذى كان فسيحاً قبل ان يحتله الباعة الجائلون و اصحاب المحلات لعرض بضاعتهم حيث انها لم تجد مكانا غيره لقضاء ايام اختبائها.......
و عرفنا ايضاً ان الساحرة الشريرة قررت البحث عن سنووايت بنفسها للقضاء عليها بعد هربها الحارس المكلف بقتلها و الذى نال اسوأ الجزاء غرقاً فى العبارة


و بعد ان بلغها هروب سنووايت الي البلد المجاور باسم مزيف قررت ان تستخدم علاقاتها للقضاء على سنووايت و لان سنووايت لم تكن تعلم بالعلاقات الدبلوماسية التى تربط رئيس البلد المجاور و الساحرة الشريرة........ فقد ظنت انها تعيش بين الناس فى امن و امان


و بدأت المحاولات
و استغلت الساحرة الشريرة لجوء سنووايت الى مسجد...و بالاتفاق مع سلطات الدولة الشكيكة ارسل الحاكم قوة ضاربة لتقتحم المسجد الذى تنام فيه سنووايت وتقوم على خدمة المصلين و الزائرين و تم القبض عليها بتهمة الارهاب وكان هذا الحوار بينها وبين سعادة البيه معاون القسم:

المعاون :س: اسمك ايه؟
سنووايت :ج:ااااااااا سنية السيد
قفز المعاون من على مكتبه وكأنه امسك بأول خيط لجريمة ما: كداااااااابة انتى اسمك الحقيقى مش كده......ها هتعترفى و اللا لا؟؟؟؟؟
سنووايت: اعترف بايه بس حرام عليك هو انا المفروض اكون عملت ايه؟
المعاون: حرام عليا يا مجرمة ده انتى لسه هتشوفى ...استعبطى يا بت استعبطى...بأة مش عارفة عملتى ايه؟؟ انتى متهمة بالانضمام لجماعة ارهابية خطيرة
سنووايت وهى تلطم: ارهابية مين يا بيه انا اصلا مش من هنا انا من......
يقاطعها المعاون و قدرفع حاجبيه و هو فى منتهى الاعجاب بنفسه لقدراته الرهيبة فى استخلاص المعلومات: وكمان جاسوسة (و يكاد يزغرط و هو يفكر فى الترقية اللى جت لحد عنده)
سنووايت: لا لا جاسوسة ايه ده انا بنت ملك البلد المجاورة
المعاون و هو يضحك ملئ شدقيه : ههههههه و ده بأة يبأة زى ملك الفخفخينا
و اللا ملك المانجو, شوفى انا تعبت منك
انا هوريكى
و يخبط بيديه على المكتب وينده بصوت عالى و حاد: يا عبد العال!!!!
تصاب سنووايت بالهلع من الاسم فقط و لم تتخيل ابداً ما ستراه برؤيتها لعبد العال ذلك الرجل الذى يشبه عمارة من 3 ادوار و لابس زعبوط


و بعد حجز سنووايت لمدة 6 سنوات بلا اى ادلة او مبرر تم اطلاق سراحها
لكن خرجت سنووايت البريئة من السجن و هى غير سنووايت التى دخلته
و قررت ان انسب مكان لشخصيتها الجديدة هو شارع الهرم بملاهيه ولياليه...وهناك لن يستطيع احد ان يتهمها لا بالارهاب و لا غيره.....
و ضاعت سنووايت فى ليالى الهرم و صارت تعيش فى حى عشوائى من عشوائيات الجيزة.......لا يعلم عنها احد شيئاً

و بعد ان انشغلت الساحرة الشريرة عن سنووايت زمناً ....جال بتفكيرها سنووايت و التى ظنت انها راحت ايامها
وتوجهت الى مرايتها و كالعادة سألتها:

الساحرة: يا مرايتى يا مرايتى الا هى فين البت سنووايت دلوقتى وفين اراضيها
استيقظت المرايةمن نومها العميق وتنحنحت و قالت مغمضة العينين: فخامتك كنتى بتسألى على حاجة؟؟
زمجرت الساحرة و قالت: ماتصحصحى معايا كده بقولك فين سنووايت دلوقتى
تثائبت المرآة وقالت : من ساعة ما اتقفشت فى القسم و هى مش طالعة عندى فى السيستم خالص بس سمعت انها عايشة فى مكان عشوائى تعيس فى البلد الشكيكة
كشرت الساحرة عن انيابها و قد استقر فى قرارة اعماقها انه ما حك جلدك مثل ظفرك
و اجرى يا ابن ادم جرى الوحوش غير رزقك لن تحوش....فقررت ان "تنزل" هى الاخرى الى البلد الشكيكة لتبحث بنفسها على سنووايت


و بالفعل "نزلت" الساحرة على بلاد الاخوة الاشقاء و بعد بحث وتدوير طوييييل استطاعت الوصول الى سكن سنووايت و وجدت انها تعيش فى عشة فوق سطوح منزل فى حى عشوائى
وقررت اللجوء الى الحيلة وارتدت زى امرأة عجوز فقيرة تبيع التفاح و وضعت تفاحة مسمومة فى السلة التى تحملها
وتربصت بها الساحرة حتى وجدتها عائدة الى عشتها بعد منتصف الليل تترنح
فصعدت ورائها و طرقت الباب

تفتح سنووايت الباب بصعوبة و تفتح عينيها بصعوبة اكبر وقالت:

سنووايت: انتى مين يا ولية ....و عاوزة منى ايه عالليل
ترد الساحرة مصطنعة للمسكنة: انا ست غلبانة ببيع التفاح عشان ااكل عيش
ترفع سنووايت حاجب وتخفض الاخر و ترد وهى تمضغ لبانتها: تفاح ..... تفاح ايه ياختى و هو التفاح ده يأكل عيش؟ وهو فيه حد اصلا لاقى ياكل عيش حاف عشان يشترى تفاح
حاولت الساحرة مقاطعتها - عشان تنجز - و قالت: طب ماتجبرى بخاطرى و تاخدى منى التفاحة دى هتعجبك خالص و لو ما عجبتكيش ما تشتريش
خطفت سنووايت التفاحة من يد الساحرة و قالت وهى تنظر للتفاحة بشره : تعجبنى و اللا ماتعجبنيش حد لاقى ........بس دى ما تتاكلش كده على لحم البطن احنا نضرب سندوتش كبده من عند عربية الواد عبده اللى على الناصية و بعدين نحلى بيها تعالى معايا اضربيلك سندوتش ده انتى شكلك هفتان اوى
و لم تكذب الساحرة خبر لانها كانت جعانة فعلا و لحرصها على الوقت قبل النور ما يطلع و الشارع يدزحم و ما تلاقيش مواصلات للحدود

و توجهتا كلتاهما الى عربية الواد عبده ....وناولتها سنووايت سندوتش لو اكتفى العاقل بمنظره لتوجه الى المستشفى من قبل ان يأكل .......و ابتعلت سنووايت السندويتش كله مرة واحدة و امسكت بالتفاحة و هبرتها هبرة واحدة و بينما هى منهمكة فى اللغ....وجدت الساحرة على الارض وفى يدها نص الساندويتش و اليد الاخرى على بطنها تصرخ من الم شديد وهى تنادى سنووايت: انتى اكلتينى ايه الله يحرقك
لم تترك سنووايت التفاحة من يدها و هى تقول : لا حول و لا قوة الا بالله....ايه يا ست شكلك مش واخدة على الحاجات الحريفة دى بأة حتة سندوشت يعمل فيكى ده كله
وتعالت الصيحات بضرورةطلب الاسعاف للست الساحرة لكنها كانت قد لفظت انفاسها الاخيرة قبل وصول الاسعاف بساعتين فقط........و عادت سنووايت الى عشتها و هى لا تعلم ما الذى حدث .....و ضحكت فى داخلها وهى تقول .....ناس خرعة صحيح

تمت
:D

مستشفى رمد"عيون يعنى" و راكن فى مدخلها عربية كشرى
يبأة انت اكيد اكيد فى مصر

سنووايت و السبع بنات

فى بلد بعيدة بعيدة كان فيه ملك عنده بنت جميلة اوى اوى اسمها سنو وايت "بياض التلج" حسب الافلام المدبلجة
لكن ام البنت دى ماتت وهى صغنونة خالث قوم ايه الملك خاف على نفسه من الفتنة و قرر انه يتجوز

و شااااااااااااء القدر انه يقع فى ساحرة شريرة شريرة
ما بتحبش غير نفسها و بس و كان عندها مراية سحرية بتتكلم و بترد على كل اسئلة الساحرة الشريرة
و كانت كل يوم تسألها وتقول:
الساحرة : يا مرايتى يا مرايتى مين احلى واحدة فى الدنيا دى
المراية وهى بتتنهد : نانسى عجرم....احم احم اقصد انتى طبعا...لكن كل اهل المملكة بيقولوا ان سنو وايت احلى منك
الساحرة : ينيلك ....بأة كده.......طيب انا هعرف ازاى اأدب الشعب ... اقفلوا جرايدهم
المراية: ما احنا قفلناها من زمان و ما فيش دلوقتى غير جريدة صوت الملكة
الساحرة: خلاص اقبضوا على اى حد يتكلم عليا كلمةواحدة
المراية و هى تتصبب عرقاً- حلوة تتصبب دى : احم ....الشعب كله بيشتم فى جلالتك ولو قبضنا عالشعب كله مش هتلاقى حد تحكميه
الساحرة و هى تصرخ: خلاص يبأة اصرفوا مكافأة سحتوت - عملة بلدهم - لكل واحد يدعيلى
المراية و قد ايقنت ان الساحرة ممكن تكسرها فى اى لحظة: خيرك مغرقهم فخامتك بس المشكلة فى الضريبة العقارية اللى فرضناها جديد على الاكواخ والعشش الى هما عايشين فيها خربت بيوتهم
الساحرة زاجرة : طييييب انا هخلص من البت دى خالص وارتاح منها الى الابد الىىىىىىىىىىىىى الابببببببببد نياهياهياهاهااها- ضحكة الساحرة الشريرة

وقررت الساحرة انها تبعت سنووايت مع واحد من الحراس عشان يقتلها فى الغابة بعيد من غير ما حد يعرف
لكن الراجل ماجالوش قلب وكان عنده عيال فراح قال لسنو وايت :

الحارس: الملكة امرتنى انى اخلص منك هنا لكن انا هسيبك تهربى عشان ربنا يقعدهولى فى عينى و عافيتى اجرى يا بنتى لاخر الغابة هتدخلى على البلد اللى جنبنا خبطى على السور طلعيلهم البازبور و ادخلى

جريت سنو وايت وهى مش عارفة تروح فين
وفضلت سنو وايت تجرى تجرى لغاية ماوصلت للجدار الفاصل بين بلدهم و البلد الشكيكة
وعشان تنفد بجلدها وما يرجعةهاش تانى بلدها للساحرة الشريرة قررت تغير اسمها و بقى اسمها بدال سنووايت.....سنية السيد وايت-تمويه يعنى

و بعد ما حجزوها على الحدود يجى تلات ايام اخيرا قدرت سنية السيد تدخل البلد الشكيكة بشخصيتها الجديدة
و لانها كانت تعبانة جدا جدا نصحوها ولاد الحلال انها تلجأ لمنطقة اسمها السبع بنات فى اهددددددى مكان فى الارض حتة اسمها غريب عليها جدا حتة اسمها "الموسكى"
ولما سألت تروح ازى نصحوها ولاد ال.........حلال برضه انها تقدر تركب اتوبيس 700 بشرطة بيعدى من هناك

وبعد ان جريت سنية السيد "سنووايت سابقا " وراء الاتوبيس مسافةتوازى اللى جريتها من قلعتهم للحدود قدرت بفضل الله تركب الاختراع العملاق اللى اسمه الاتوبيس
وبمعجزة من السماء قدرت سنيةتوصل لباب الاتوبيس عند السبع بنات بعد ما هدومها اتقطعت وشعرها اتنكش وحالتها بقيت بلا
و اكتشفت ان السبع بنات ده ما هو الا منطقة مسماة على اسممسجد مقام هناك ولما سألت عن السبع بنات دول مين طبعا ولاد الحلال اييييييييه قالولها ما نعرفهومش
بصت حواليها لقيت ستات كتيييييييييييير شايلين حاجات ياااااااااما و بيجروا فى كل اتجاه
ورجالة بيجروا ورا الستات دول من غير سبب
خافت سنية السيد وايت وقررت انها تقضى ليلتها فى جامع السبع بنات

و فى قصر الساحرة الشريرة
حبت الساحرة تطمن على نفسها بعدما افتكرت انها خلاص خلصت من غريمتها الوحيدة
وسألت مرايتها المنافقة
الساحرة : يا مرايتى يا مرايتى مين احلى واحدة فى الدنيا
المراية وقد ايقظها النداء من احلام اليقظة: ما قلنا نانسى عجرم
اقصد انتى يا فخامتك
بس الناس لسه بتقول ان سنووايت هى احلى واحدة
الساحرة و قد جحظت عيناها من الغضب: نعععععععععم يا عممممممممر سنووايت ازاى....ايشحال انا بعتها مع الحارس يخلصنى منها
المراية: واضح ان الحارس خدعنا لما قال انه خلص منها
الساحرة: طييييييييييب انا هعذبه عذاب شديد.......امسكوه من ايديه و رجليه و ركبوه غصب عنه اتوبيس العتبة و اكلوه غصب عنه عيش من المخبز الشعبى و لازم يكون بمساميره
و شربوه مية الحنفية كل ساعة - من غير فلتر -و فى الاخر ركبوه عبارة و اللا قطر عشان يموت شر ميتة و يعرف ان اللى يخدع الملكة سنته سوووووودة
اما سنووايت
فسيبوهالى اناااااااا
نياهاهاهاهاهاهاها

و انتظرونا فى الحلقة القادمة
من مغامرات سنيةا لسيد وايت

أنا و حمادة سنة 2050

الزمان: سنة 2050
المكان: احدى العشوائيات الجديدة التى ظهرت فى ال50 سنة اللى فاتوا
الشخصيات: انا و ابنى الكبير حمادة
المشهد العام:انا بعد ما كبرت وكحكحت وبقى عندى ييجى 70 سنة وماشية مسندة على دراع الواد ابنى الكبير -ما شاء الله كبر وبقى زى الشحط - اصريت انزل معاه وهو بيشترى شوية طلبات عشان امشى رجلى شوية بدل ما زوجى العزيز مش راضى ينزل معايا عشان قال ايه بطيئة - قال يعنى هو مركب باتيناج - وماشيين فى شارع واسع بس على يمينك مقلب زبالة عملوه سكان المنطقة العشوائية دول الله يسامحهم
واحنا ماشيين سرحت و اصريت احكى للواد ابنى تاريخ الحتةاللى احنا ماشيين فيها لانها الحتة اللى اربيت وترعرت فيها
و كان بيننا الحوار التالى:

حمادة: يا ماما معلش مدى شوية عشان الحتة دى خطرة و ممكن اى حد يطلع علينا بمطواة يقلبنا و انا مش هعرف اتصرف وانتى معايا

انا: يقلبونا ده ايه .....اى حد هيهوب ناحيتنا هقلع اللى فى رجلى و اعلمه الادب ...قال يقلبونا قال

حمادة: خلاص يا ماما ما تزعقيش والنبى حقك عليا...بس برضه ممكن نمد شوية

انا: يا واد انت مستعجل كده ليه ....ادينا بنتمشى و بعدين ابوك بقاله كتير حابسنى جنبه فى البيت و انا ما صدقت انزل اتمشى شوية

سرحت شوية كده فى ملامح المنطقة التى تغيرت تماما عما كانت منذ 50 عاماً...و احسست لاول مرة بالفزع من مدى تغير ملامح المنطقة

فتنهدت تنهيدة "من المعاميق" و قلت للواد حمادة: تعرف يا واد يا حمادة زماااااااان و انا شابة صغنونة الحتة دى كانت من ارقى احياء القاهرة

حمادة و هو ينظر لى باستغراب : ايه...مقلب الزبالة ده كان ارقى احياء القاهرة !!! ازاى يعنى؟؟
انا و قد اثار حماسى لاحكى له عن تاريخ المنطقة: يووووووووو هو انتوا شفتوا حاجة
انتوا جيل منحوس ما شافش لا جمال و لا نضافة ....فاكر زمان يا واد لما كنت بذاكرلك درس الانهار فى الجغرفيا وانت فى المدرسة...مش كان فيه جزء بيتكلم عن نهر النيل؟؟

حمادة و هو مصر ان يسير باسرع ما تمكنه مشيتى القصيرة الضعيفة: لا مش فاكر يا ماما......اذا كنت مش فاكر احنا نزلنا من البيت ليه اساساً هفتكر درس المش عارف ايه....

انا : يا ساتر عليك دايما كده تحبطنى زى ابوك .....المهم ... شايف المزبلة اللى جنبنا دى؟...اهى مكانها بأة كان فيه مية ....اه ...مية نهر النيل

حمادة و هو يتصنع الانبهار: يا سلااااااااام و القهاوى و الغرز و الاكشاك اللى مالية المنطقة دى كانت فين؟؟؟كانت بتعوم عالمية؟؟

انا: لا يا فالح دى ما كانتش موجودة اساساً......ده هنا كان فيه نخل وشجر و كازينوهات ونوادى ......يووووووووو كانت دنيا تانية......هو انتوا جيلكوا شاف حاجة؟؟؟
كان اللى يبأة متدايق او حران او زهقان ما يلاقيش حتة يتفسح فيها غير هنا
و كان مكان كوم الزبالة العالى ده كوبرى رايق اوى وكان كل واحد بيجيب البت بتاعته او خطيبته او حتى عيلته كلها عشان يتفسحوا فوقه هنا

الواد حمادة و قد ارتسمت على وجهه بعض علامات الغباوة اللى عارفاها كويس: يا سلام للدرجة دى كان مكان حلو؟؟

انا : ياااااااااااه حلو بس....و بعدين زمان كان الواحد ممكن ياخدله دش اد تلات اربع مرات فى اليوم...مش زى دلوقتى المية بتمشى فى المواسير مرة كل تلات ايام...دى الفيران بتلعب فى المواسير دلوقتى من قلة المية

حمادة وقد امتلأت عينه بالدموع: يعنى ايه دش يا ماما؟؟؟

انا ارد عليه وهو يا عينى صعبان عليا اكمنه عمره ما شاف دش: ياحبيبى دى كانت وسيلة الاستحمام زمان...الله يرحم زمان و ايامه
ده زمان يابنى كنت تفتح الحنفية فى اى وقت تلاقى المية نازلة تروى العطشان صحيح هى كانت المجارى منفدة عليها لكن كانت موجودة ...مش زى دلوقتى ما حدش يقدر يوصل للمية غير من الحنفية العمومية اللى الحكومة بتفتحها نص ساعة فى اليوم بس لكل منطقة....
هو احنا كنا عمرنا بنشرب المية المعدنية اللى انت مالى الشنط بيها دى دى غير فى المناسبات؟؟

حمادة : و يا ريت يا ماما الحكومة عاجبها دول ناويين يفرضوا علينا ضريبة جديدة للمية
وكل ما يكون سكنك اقرب للحنفية العمومية يبأة تدفع اكتر...بيحسبوها بالمتر يا ماما

انا متنهدة: امتى ربنا يخلصنا من الراجل اللى كابس على نفسنا ده بقاله ييجى 20 سنة ...ده خربها و قعد على تلها....طالع لجده هو اللى فضل يقولنا اتطمنوا النيل عمره ما هيخلص....المية اللى فيه تكفى وزيادة لغاية
اما فضل يخس يخس لما نشف خالص

و اذ فجأة يطلع علينا عيل ما يكملش 7 سنين ممسكاً فى يده مطواة قرن غزال 7 سنتى و لم ينتظر حتى نستوعب المنظر فاذا به يشق الاكياس البلاستك التى يحملها حمادة....و خطف زجاجات المياة المعدنيه و فص ملح و داب
نظرت لحمادة نظرة ذات معنى....و لم يحتاج حمادة للايضاح....شالنى هيلا بيلا وجرى على البيت
مع قرار بمنعى من الخروج نهائياااااااااااا
:(